فقہی اختلافات کی بنا پر نمازوں کی علحیدگی

فقہی اختلافات کی بنا پر نمازوں کو الگ کرنے کا کوئی ثبوت سلف میں نہیں ہے۔ یہ فقہی اختلافات صحابہ کرام  کے درمیان بھی تھے اور تابعین کے درمیان بھی اور تبع تابعین کے درمیان بھی ۔ لیکن یہ سب لوگ ایک ہی جماعت میں نماز پڑھتے تھے۔ یہی طریقہ آئمہ مجتہدین کا بھی رہا۔ یہ بالکل ظاہر ہے کہ نماز دین کی بنیادوں میں سے ہے اور فقہی اختلافات بہر حال فروعی ہیں۔ ان فروعی اختلافات کی بنیاد پر نمازیں الگ کرلینا تفرق فیالدین ہے۔جس کو قرآن نے گمراہی قرار دیاہے ۔ نمازیں الگ کرلینے کے بعد مسلمانوں کی ایک امت قائم نہیں رہ سکتی اور اس کا امکان نہیں ہے کہ جو لوگ مل کر نماز نہیں پڑھ سکتے وہ دین کو قائم کرنے اور قایم رکھنے کی سعی میں متحد ہو کر کام کرسکیں گے۔یہ چیز اب نظری نہیں رہی ہے بلکہ صدیوں کے عملی تجربہ نے اسے ثابت کر دیا ہے۔ لہذا جو لوگ اپنے فرقی اختلاف کی وجہ سے نمازوں کی علحیدگی پر اصرار کرتے ہیں وہ دراصل دین کی جڑ پر ضرب لگاتے ہیں۔
( رسائل و مسائل – جز اول)